Grínskets frá Thule fór illa í Tuborg, tekinn úr umferð eftir að lögfræðingar höfðu samband

Vífilfell hefur tekið stuttan grínskets fyrir Thule jólabjór niður af Facebook-síðu sinni eftir að lögfræðingar Tuborg í Danmörku höfðu samband og óskuðu eftir því. Myndbandið má þó sjá hér fyrir neðan.

Í sketsinn, sem var birtur á föstudaginn, er grínað með fræga auglýsingu frá Tuborg. Þegar hann var tekin niður var búið að horfa á hann hátt í 70 þúsund sinnum, dreifa honum oftar en 450 sinnum og hátt í þúsund manns höfðu lækað hann. Þá skiptu ummælin tugum og voru margir búnir að láta danska vini sína vita af myndbandinu.

„Þetta kom okkur þannig séð á óvart. Það var Dani sem bjó þetta grín til — þess vegna vorum við kannski aðeins rólegri,“ segir Hreiðar Þór Jónsson, for­stöðumaður á markaðssviði Víf­il­fells, laufléttur.

Við fengum hefðbundið lögfræðibréf frá verksmiðjunni og vorum beðnir um að taka þetta niður. Engar hótanir. Þeir voru ósáttir við líkindi þessarar þekktu dönsku auglýsingu í íslenskum skets.

Hreiðar segir að ekki hafi verið um hefðbundna auglýsingu að ræða heldur skets sem var ekki ætlaður í aðra dreifingu. „Þetta átti að vera nett djók — við ætluðum ekki móðga neinn,“ segir hann.

„Við erum stolt af okkar Thule jólabjór og berum virðingu fyrir dönsku framleiðendunum þó að þeir hafi ekki haft húmor fyrir þessu. Það hefur verið rauður þráður hjá Thule að vera prakkari, alveg frá því að bjórinn var valinn sá þriðji besti í heimi. Síðan þá höfum við verið að bera saman bjórmenningu Íslendinga og Dana og gert grín að okkur og þjóðarsálinni.“

Sketsinn var búinn að fara víða og Hreiðar segir að mörg jákvæð ummæli hafi komið frá Dönum. „Þetta var búið að fá töluvert áhorf. Við sáum komment frá Danmörku og áttuðum okkur á því að landamærin eru engin á internetinu,“ segir hann.

Uppfært kl. 14.33: Vífilfell er búið að taka myndbandið niður en Youtube-notandinn SlikNik hefur birt hana á Youtube fyrir þau sem misstu af henni.